ناس بكري قالوا

ناس بكري قالوا الرجال والزمان مافيهمش امان، لغريبة لي معاك الزمان حلا والغيم سيب السما في عز الشتا حسيت الامان والدفا. وانا لي قلبي سكرت وانت كي ريحة الياسمين لرواريا تسللت وسكنت. ايه يرحمهم نسيت لي قالوا صوابع يديك مش قد بعضهم...
صوابعي لي كل ما نشد ستيلو نكتبلك يدخلو بعضهم والكلمات تضيع بين الوريقة و الوريقة، بين الضحكة والتعنيقة...
خفت نحبسك بين السطور، خفت تولي عليا دكتاتور، خفت لا الزمان يدور وتتعدى الايام وتوفى الشهور ويرجع قلبي مقهور...معاك مشى الخوف، حبك من عينيك مكشوف، كي تشوفني جاية من بعيد عينيك تلمع كالصغار نهار العيد، من شدة يديك باين، كل شي عليك هاين، هاين باش تشوف البسمة في عينيّا، باش تزهيلي ايامي ولياليّا...
ماحبيتش قلمي يكون ظلاّم، نعرف الحب موش كلام ولا تطير منام، أما حبيت نقلك محلاك قداش نحبك وهوينو ربي علاّم

فريال محجوبي
25 سنة