نحلم بيك ..

نحلم بيك .. اي نعم نحلم بيك.. علاش لا انا من وقتاش مانحلمش بيك .. من وقتاش نسيتك و مازرتكش .. نحلم بيك و نتوحشك .. نتوحش كلامك و ريحتك و كي تجيني في الحلم نحضنك و نسرح فيك و في تذبيلة عينيك .. نسرح بروحي و نهرب معاك بعيد .. نهرب و مايلقاونيش و يلوجو عليك معايا و يضيعو فينا و بينا .. نحلم بيك أي و في كل حلم نبني معاك دار و نجيبو صغار و ننساو الدنيا و الدين و الحلال و الحرام .. ننساو العمر إلي يكبر بينا و ننساو الڨمرة الي ضوات ليالينا .. ننساو الوجيعة إلي بكاتهم عينينا.. و ننساو وقت قاعد يتعدى بينا .. ننساو الناس و الوجوه .. وننساو الكلام و السلام.. ما يفيقنا كان صوت الحمام إلي ماليها حياتنا.. نحلم بيك و مع كل تبسيمة مابين سنيك نسرح و نخمم و نمشي لدنيا أخرى فوق بساط حرير و صوتك معنقني و عيونك تحرسني .. نتوحشك كيف في الحلم تولي بجنبي .. كيف تحكيلي و من هم نهارك تشكيلي .. نتوحشك كيف نحضنك و على وجهك نسمح و في عيونك نسرح و يطيح الليل و يمشي حس العصافر و صياح الناس و تبدى الدنيا رايضة مافيها كان أنفاسنا تدور .. و تخمم كيفاش توصل لبعضها و يوليو نفس كهو .. كيفاش يقوااو و يتعبونا معاهم .. نسرح فيهم عيونك أي و سوايع مايكفيوش .. ايامات و ما نشبعش .. سنين وفيهم لا نكل لا نمل .. حلمت بيك هزيتني و عندك خبيتني .. بستني من خدودي و لعبت بشعراتي .. كنت طفلة صغيرة متشعبطة في رقبتك .. ناسية هم الدنيا و في شونك متخبية .. كنت نتنفس بيك و ليك .. في الحلمة قتلي مش نخطفك و لبعيد مش نهزك .. قتلي ماتخافش مادامك معايا .. إنت هوايا و سمايا .. إنت دايا و دوايا .. إنت القلب الي بيه نعيش و نحلم .. محلاها حلمة .. و محلاك معايا .. محلاني و محلاك و محلاناا كي في بعضنا نعيشو ..

_________

صابرين حتيت