مسيرة حب ..

الحب كلمة تتقال برشا .. ديما نسمعوها و ساعات نسرحو و نضيعو معاها .. نقولو زعما الحب موجود .. زعما كيف نحسوه نفرحو .. زعما وين يتباع و كيفاش نلقاوه .. -أي الحب حاجة محلاها .. حاجة يحسها قلبك و يسافر معاها لبعيد .. يدور و يحوس و يجنح بجناحااتو لآخر سماا .. الحب نلوجو عليه .. كيما نجمو نقابلوه صدفة .. مش محسوبة .. الحب ماغير حسابات و زيد و نقص .. الحب هو الدنيا .. و الدنيا هي الحب .. تبقى تستنى في كلام كيف هاذا باه تتحرك .. باه تعيش و تطير و تحلم .. تحلم بجنة و عصافر دايرين بيك .. يغنيولك .. يفرحوك و يفرحولك .. أي قالولي الحب لازم نلوجو عليه .. و تبدى تلوج .. تبربش و تضيع .. تخمم في هاك الجنة الي مش يهزك ليها .. تخمم في النوار و الربيع المزيان .. تخمم تحط راسك عندو و تنسى هموم سنين تعدات .. تلوج فيه على برشا حاجات ناقصتك .. على بوسة صباح كيف الصغيرات .. على تعنيقة تتكسر بيها ضلوعك باش تحس إنك نجمت تتحب و تحب .. تلوج على وذن تسمعك تشكي من هم نهارك .. تلوج على حاجات ضيعتهم .. تسأل روحك علاش الناس الكل ماتلوجش كيف هو ساهل هكا .. علاش مافماش حب بيناتهم .. -لا ماهواش ساهل .. الحب ماهوش بوس و تعنيق و كلام معسول يهزو الريح .. كيف ورقات خريف ذبلو و طاحوا .. الحب بحر .. بحر يغرق .. و مايمنع كان العوام .. الحب ثقة و إحترام .. الحب أنواع و رد بالك تخلط بيناتهم .. مالازمك تظلم حد .. مالازم تنطقها كان وقت تحسها .. تحسها خارجة من بين ضلوعك .. تحس لسانك ثقل و إنت تنطق فيها و ايدك رجفت .. بدنك سافر و مخك طار .. تسرح مع الي قدامك و ماعاد تسمع شي كان صوت قلبك .. وقت تكون مستعد تخلي كل شي خاطر إنسان .. وقت تنسى إنك قريت حساب و تنسى تخديم المخ و الذكاء .. وقتها إنت تحب .. وقت تغرق في عيون الي تحبو .. وقت تشوفو قلبك يرجف .. كيف تسمع صوتو تتلكون و يهرب الكلام .. هذاكا حب .. كيف تقدرو و تسامحو هذاكا حب زادا .. ايييه هااو صعيب .. هاو يخوف .. كيف مانكونش قد المسؤولية .. كيف نبلبزها .. أما مش نحب .. مش نجرب و ننسى الكلام الكل .. مش نحلم .. و حتى كيف نجي نفيق نعاود نسكرهم عينيا باش غير الحب مانشوفش .. مش نطيح في بالي .. مش يتكسرو جوانحي كيف عصفور صغير .. أما ميسالش .. نتصلح .. ننسى الوجيعة و نبدى من جديد .. مانيش مش نموت كان نجرب ... خليني نقوم وحدي و نحرق الي يقلي لا .. نعيش بالنهار و بالساعة نحلم و نستنى في الحب .. مانيش مضيعتو ..

_________________

صابرين حتيت

Partager cet article

Repost 0