علاش ..

علاش ..

علاش مانجموش نحبو من غير حسابات و عقابات و كلام و سلام من غير نفاق وترهدين و تزعبين ..بعيد على الناس على عينيهم الزايغة و كلامهم المرزي و مخهم الخامج و عالمهم الفارغ .. نكفروا بيهم و نمنوا ببعضنا .. علاش مانجموش نحبو حب صافي دافي أعمى أصمى ليه عينيك تغمض و قلبك تحل و تسلم ... علاش مانحولوش نخرجو من خرافاتنا و تفهاتنا و عاداتنا و نمشيو نبنيو حاجة جديدة بيضة كالثلج واسعة كسماء و الأرض وغارقة كالبحر...
وعلاش منجربوش ؟؟
إيجا هات خلينا نكتبو حكايتنا خرافتنا و حدنا في دنيتنا في عالمنا و تولي سما سمانا و الأجبال جبالنا و الأخضار خضارنا و البحر بحرنا .. خلينا نجريو و الريح يطيرنا و كي نتعبو يلوحنا علحشيش تحت هاك الشجرة و في ضلها نتخباو و نرقدوا من غير مانحسوا ..و خلي وردنا ينور و عمرنا يزهر سمانا و تمطر و أرضنا تنبت ..أيامنا تزهى و ليالينا تضوى ، إسمك على جبيني و إسمي على جبينك يدك في يدي و يدي في يدك و راسي على كتفك ، صوتك غنايتي و بسمتك مفتاخ قلبي و هواك أنفاسي و دمك يمشي في عروقي ..و خليني.. خليني نملا عينيا بيك ..ونخبيك في شعري بين الشعرة و الشعرة الخصلة و الخصلة .. في بدني بين الضلعة و الضلعة ..في قلبي و مانخرجك ..
نكتبوا رواية .. رواية حبنا و نصنعو موزيكتنا و نطيبوا عشانا علحطب تحت سماء و نسهروا عالنار ، كتب لدريش و قباني و صوت فيروز .. و ياعيني على سهريتنا جونا و حبنا و دلالن
و علاش منجربوش؟ هيا هيا نجربو ..

_________

رنيم الغزيل، 17 سنة

Partager cet article

Repost 0