حكايات ..

ايجاا نتخباو .. نهربو .. على عينيهم نضيعو .. ايجا نحكيلك حكاية .. نالفلك رواية .. ايجا و بصوتي نسمعك غناية .. ايجا نبنيو قصر بالقش و فيه نسكنو عصافرنا .. ايجا نحكيو و نتهامسو و يطيح الليل و تسمع الناس الهمسات و اللمسات و تحير و تتساءل و مابينهم يضيعو .. ايجا خليهم يسرحوا فينا و في كلام معسول نتبادلوه .. في غزرة مزيانة تزينا و تحلينا في عينيهم .. في ضحكة مرسومة على شفايف مليانة تفاؤل و حب و حاجات تنسي الفقير فقرو و الجيعان جوعو و العطشان تدلو عالمااء .. حكاية بسيطة نحكيهالك و في عينيك نضيع و نسرح و ننسى العيون إلي خلقها ربي الكل .. هياا هيا ايجااا ... - نجي أي و في عينيك نسرح و مع أنفاسك نطير .. و في ريحتك نعوم و ماانتعبش .. أي نجي و نرسملك بسمة على شفايفك و ضحكة في عينيك .. نخبيك في صدري بين ضلوعي نحطك .. نغوص في خصلاتك إلي على وجهك هابطة .. نمشي مع بسمتك لبعيد و ماا نرجع كاان و يدي في يدك .. يدي في يدك و يدك في يدي و في هااك الغابة نضيعو و نطيحو و نقوموا و ننساو الوقت و الشمس ، و الضو و الظلام .. و ننساو إلي فما دنيا نعيشو فيها .. -و النهار يضيعنا .. و الليل يدفينا في شتااه .. و في صيفو يسهرنا لصبااحو .. و الشمس تجهرنا و القمرة تضوي ليالينا .. ايجا نسافرو في طيارة ورق .. نصنعوها و في أحلامنا نركبوها .. ايجا نعملو حاجة ماا تشبهلهمش .. ايجا نجريو و في الشارع نبوسك و لدنيا أخرى نمشيو .. ايجا نبنيو و نعليو و نعمرو .. مش داار و صغار رااو .. ايجا نبنيو أحلامنا و نعليوهاا لفوق .. ايجا نعمروا قلوبنا بالحب و الفرحة .. ايجا نرجعو لوقت الجوابات و الحشمة .. شقولك نكتبلك جواب فيه وقتاش ووين وكيفاش نتقابلو ؟ و تجاوبني بحشمة إنو انجموا نتقابلو تحت هاكي الشجرة .. في ظلها نتخباو و بعصافرها ننساو .. -شقولك نبنيو دار فوق السماء .. وين مافمااش عباد و مافماش قيل وقال .. وين الدنيا صافية و الهواء نظيف .. نعملو مفتاح لحياتنا باش ماايدخلها حد .. أيا نجي وإلا عندي تجي ؟ توحشت ، توحشت و توحشتك .. توحشت السماء في نظراتك و الدنيا في ضحكاتك .. كي تضيع فيا و نضيع بيك .. توحشت نطير و مانهبطش .. نخبيك و ماانسيبكش .. حياتي نسميك و عمري نعطيك .. نغطيك ، نعريك .. نسمعك و حسك نتنفس .. توحشت شعراتك و خصلاتك .. توحشت العركة و العركة إلي بيناتهم ضحكة .. كلمة حلوة و بسمة حنينة .. توحشتك ...

____________________

ص.ح

Partager cet article

Repost 0