تهلويس


موش عيب انك تعرف غيري وقت اللي حكايتنا مازالت كي وفات
وكيفاش توفا اذا كان هي لتو ما بدات ...
وبعد تقول هي باينة ماللي بدات ...
وهذا لكل موش عيب منك ..مني اللي فهمتك بالغالط
و دخلت نبني في قصور في الظلمة تهدت في النور ..
وخيال مشا لبعيد يحلم بيك ومعاك وكي فاق تكوى بجفاك ..
وقت اللي تبدا معايا وموش معايا ..
متفارقين ومش متفارقين ...
نكلمك وتهز عليا ..وانتي بعيد وما تحبش تبعد عليا ..
كلامك يخليني نغرق و ناي مانيش عوامة ..
نغرق في واد بالدوامة ويلف بيا ويدور
وبعد يرميني عالشط ذليل من غير دليل نتخبط
نلوج على بلاصة نرسم خيالك
بين الصخور وتحت التلة والغصون
نلوج على جغمة من صوتك ترويني
تحييني من موتي و تلهيني
نلوج على ريحتك اللي ما نعرفهاش وطبيعتك اللي ما بدلتهاش ...
وعيب تنادي عليه وبعينك تفركس فيه ..
عيب كان انتي تتفكر وهو لا ..
هايمة تلوج على ابرة في كدس تبن ..
على روحك بين برشا بنات ..
على اسمك بين برشا جملات ..
وبرا حوس وين تبات ،بلاصة ما يسمع فيها حد نواحك
وما يركز حد مع كلامك ..وما يلاحظوش نبرة صوتك المتبدلة
وعينيك الذابلة ووجهك المصفار ...
وهذا الكل نار شاعلة فيا لا حابة تتطفا ولا تبرد عليا ..
في لحظة ما عرفتكش ،لوجت وما لقيتكش
كل شيء يمشي بالمقلوب ..
وناي مغرومة وعلى حبك ما نتوب ...
حبك اللي يكوي ويشوي ..لحظة يفرح و10 يبكي ..

ريهام الشطي

Partager cet article

Repost 0