sq
sq

..

هوما زوز حكايتهم حكاية..
حكايتهم كالشمس و الأرض .. حكايتهم كالسماء و النجوم ..
بدات بحاجات مزيانة ..
وتلموا فيها حاجات احلى ..
نتفكر الشتاء الي جمعنا ببردو و دفانا في نهارو .. و بظلامو و حديثنا في ليلو..
في النهار نتلمو .. و في الثنايا نضيعو .. نحكيو حكاية لكل بلاصة تجمعنا .. نخليو في كل بلاصة حاجة مزيانة .. حاجة تتفكرنا بيها و تحكيها لكل حد يزورها ..
نمشيو و نمشيو و ما نتعبوش .. في هاك النهار الي جمعنا اول مرة ..
مشينا و خلينا ضحكاتنا ورانا .. خلينا شوية حب و برشا فرحة ..
و هزينا معانا عيون تلمع و يدين دفيانة ..
هزينا الحب و الراحة ..
و النهار الي يتعدا من صباحو و احنا مع بعضنا .. النهار يقلبلنا حياتنا ، نتفكرهم مليح اكا الايامات ، نتفكر كل حاجة فيهم ، حتى تعبهم و نومهم ..
و السهر في ليالي الصيف الي اتعبناا .. اما نبقاو نحكيو لين يوفاو المواضيع .. ما نلقاو فاش نحكيو .. وقتها نبقاو ساكتين .. اما حتى سكوتنا عندو عنوان..
و قلوبنا هي الي تحكي ..
تحكي الي فيها الكل .. تحكي على حب و فرحة و حاجات مزيانة ..
تحكي على حكايتنا الي تواعدنا نحكيوها للناس الكل ..
كنا نتقاسمو ضحكاتنا .. فرحتنا .. و حتى فدتنا ..
كنا نتعبو مالدنيا الكل و مانتعبوش من بعضنا ..
نتعبو مالوقت الي يتعدا بلاش بينا و البلايص الي تتزين في غيابنا..
هي الحكاية ما تتحكاش بالساهل ..
هي حكاية ألف ليلة و ليلة ..
هي رواية و إلا يمكن خرافة ..
تتحكا للصغار قبل الكبار .. هي مش كيف الحكايات الكل .. ماتشبه لحد كيف اصحابها .. مايفهمها حد و مايحسها حد ..
ايجا نخرفولهم خرافتنا ..
ايجا نحكيولهم على عنادنا و هبالنا ..
على سهرياتنا و ذمارنا ..
ايجا نحكيولهم قداش نشبهو بعضنا .. موسيقتنا كيف كيف .. ضحكاتنا ماتبعدش بعضها في الزين .. كلماتنا إلي تتنطق في نفس الوقت..
أصواتنا و غزراتنا .. حتى عيوننا نراهم متشابهين .. عبد إلي نرا فيهم روحي .. ماينجمو يكونو كان عيوني ..
غشنا إلي مايغيبش على عركة وقت يكثر الوحش و تتعب القلوب ..
حتى عركناا لازم نتفاهمو فيه ..
ماانحكيوش على العكس إلي عنا في زوز ..
هذاكا إلي محليها الحكاية راو ..
الأيام و الليالي إلي نعديوهم حب و كلام لوجوه الصباح و يسرقنا الوقت ..
يضيع الوقت و مانحسبوهش ..
أما إلي يتعدى بينا في مشكلة يتحول و يولي سنين ..
كل شئ شاهد على إلي جمعنا ..
الثناايا العربي و حتى الكياسات ..
الأجبال و الخضاار .. الشمس كي تطلع و كي تغيب ..
ليالي الشتاء الباردة بسحابها .. و ليالي الصيف بسهرياتها ..
كاس القهوة البنينة و الكراسي المنصوبة .. البحر بنسماتو و الصخر بكسوحيتو ..
الضو و الظلام ..
كل بلاصة تحكي حكاية زوز بعدتهم المساافات اماا قلوبهم هي هي ..

 

صابرين حتيت

Partager cet article

Repost 0