فاهم اما مش فاهم

ماعادش عارف الصحيح مالغالط, الكذب مالحقيقة.. فوضى و حس في المخ مانجمتش نعبر عليه خاطر بيني و بين روحي مانيش فاهمو. نرقد و نفيق على نفس السؤال, علاش؟ مالقيتلوش جواب واضح.. زعما مازلت صغير باش نفهم؟ و الا هوما يخدمو مخاخهم برشا لين ماقعدتش تصويرة واضحة تتفهم؟ الكلام معاهم نقص, و زاد معاه, العبد الي نغزرلو في المراية كل يوم خاطر كان هو اللي يعرف عليا كل شي و عارف اش نحس.. يعرف الصاحب اللي استحقني و تلهيت بيه اكثر من روحي ووقت اللي استحقيتو خلاني و مشا كي وفات مصلحتو. يعرف الطفلة اللي نشوفها في البنات لكل, صباح و ليل نشوفها بين عينيا, في حلمة و في واقع, و هي في فرش واحد اخر, علاش؟ خاطر حبيت و عطيت و تلهيت و ماطلبت شي.. العين شافت و القلب تعبا و الفم تسكر كيف شاف العوج, الحقد و الحسد على ضحكة حتى و لو كانت صفرا.. العين تشوف فاللي نهارو لكل في الجامع و اخلاقو مافماش لا قدر كبير و لا صغير, السوكارجي اللي يشوفوه فاسد و مش عارفين اش لزو, اما كيف يشوف حد طاح يجريلو باش يقيمو, في الطفلة بالقصير خاطر تحب تلبس اما مخها مستور, و اللي ساترة بدنها و معرية مخها.... نشوف فاللي يلبس بالملاين و يطيش الزبلة في الكياس و مايتصدقش للي يستحق...علاقات بين لعباد فسدت و تمسخت, كل واحد يشوف في الاخر دروج يطلع عليه باش يوصل وين يحب, نشوف الكذب و الترهدين, اللي يفيس بقداش من طفلة يعرف و اللي قداش من طفل وراها.. نشوف في روحي وحدي غريب, علاش؟ خاطر السكات صاحبي, موزيكتي في وذني عشيرتي و كتابي خويا.. مانيش فاهم الي صاير مش نقص مني, اما خاطر مانيش كيفهم, ما نلوجش على مصلحة, ما نكذبش, ما نستغلش, ما نافقتش ربي و عبادو, ساكت كهو, نشوف فاللي صاير و نقيد و نتعدى على روحي.. هذاكا علاش وحدي, و محلاها الوحدة, محلاه السكات, ماتمسخش وذنيك بالقيل و القال, ماتضيعش وقتك, وقتك خليه لروحك, تحكي مع روحك, تخمم على روحك, ضو القمرة و النجوم يونسوك, سيقاروك يحدثك. مازلت صغير ايه اما فهمت برشا و عرفت ثنيتي..

فاهم اما مش فاهم...

Partager cet article

Repost 0