حَبّيتْ ...

نحب نسميك حلمة، حلمة بنينة ، يدين حنينة ، عينين تتبسم ملي تلاقينا و حكينا...أما الحلمة توفى، و الكلام يوفى ...

نحب نسميك حقيقة، حقيقة خلاتني نفكر فيك كل دقيقة، نحس ببوستك الرقيقة ، أما الحقيقة ساعات توجَّعْ، و التخمامْ يمكن يضبّعْ ...

نحب نسميك هبلة ، هبلة نشاركك فيها جنوني، ونحكيلك علّي فِمَكْنونِي، تِهبل معايا و تجاريني، تسهرني، تفيقني، تضحكني، تبكيني، تواسيني، تنسيني... تنسيني في دنيا لي مالقيتش فيها روحي، عايشة نضحك و نخبي في جروحي... علاش ما يكونش الهبال هو الصحيح؟ علاش كي ما تكونش كيفهم تتعب و طيح... ؟ ...نحب نسميك هبلة أما الهبال بكفّ يمكن يفيق...

نحب نسميك "لوجيك" ، خاطر بعقلك ملكتني، في مخك سكنتني، بأفكارك سحرتني ...أما "اللوجيك" فيه حسابات، تنجم عليا تبعدك قد ما في شعري من شيبات...

قررت لي إنت الكلّ، حلمتي المهبولة و حقيقتي اللوجيك، ونحب نعيش بيك، ليك و فيك ، نقسم معاك أيامك و لياليك ... نقسمو التخمام و الكلام ، الغزرة لي تهزنا لدنيا أخرى ...السكات لي يلخصلنا الكلمات... اللمسة و الهمسة ...

نحبنا كي نحكيو و نضحكو ! عينيك كي الصغار ساعات يلمعو و ساعات وسط السكات و الظلمة يدمعو...! نحبهم عينيك ... نحبنا كي نشكيلك و تواسيني و تنصحني ، شفايفك لي بداو يحفظوني ، كيف يتبسمو يا ميمتي ... ما بنّهم حتى ساعات كي تصيح تحب تكبسني ، نحبّهم! نحبنا كي تجبدني ليك و تحطلي راسي عندك، و تلعبلي بشعري بيديك لي نعشقهم، (مغير ما طرشقهم....صوابعك*) نعشقهم كيف نحط يدي فيهم و صوابعي تدخل في الفضا لي بينهم، نحبّهم ! ... مانيش باش نحبك أما حبيتنا ... خلينا هكا، مغير تخمام يطير المنام، نحب نحقق معاك شوية من الأحلام، موجة بحر وظل شجرة ، فنّ وموزيكا وأفلام، موش أفلام* ...

شطحة و ضحكة و برشا محبة ...

و تبعني نبنيو الدنيا زينة ...

نحبنا .

_______________________________________

فريال محجوبي طالبه 24 سنه

Partager cet article

Repost 0